ភ្នំពេញ៖ លោក តឹក ប៊ុនវី ប្រធានសហព័ន្ធកីឡាកាយវប្បកម្ម និងលំហាត់ប្រាណកម្ពុជា បានឱ្យដឹងថា ព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ នៅវៀតណាម សហព័ន្ធត្រៀមកីឡាករ៤រូប និងគ្រូបង្វឹកមួយរូប ដើម្បី ប្រជែងមេដាយជូនកម្ពុជា។
លោក តឹក ប៊ុនវី បានថ្លែងថា ស៊ីហ្គេម នៅវៀតណាម គឺជាស៊ីហ្គេមយុទ្ធសាស្រ្តរបស់សហព័ន្ធ ដើម្បីឱ្យក្លាយជាបេក្ខភាពពេញសិទ្ធិ របស់ Camsoc សម្រាប់ កីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា។
ដូច្នេះហើយ អត្តពលិកសហព័ន្ធកីឡាកាយវប្បកម្ម និងលំហាត់ប្រាណ ត្រូវធ្វើយ៉ាងណាហ្វឹកហាត់ឱ្យខ្លាំង ត្រៀមខ្លួនឱ្យបានល្អ ដើម្បីដណ្តើមមេដាយ ប្រាក់ ឬមាស ឱ្យបាន។
ប្រធានសហព័ន្ធ បានបញ្ជាក់ថា របាយការណ៍ និងផែនការមេរបស់សហព័ន្ធបានដាក់ជូនគណៈកម្មាធិការជាតិរៀបចំព្រឹត្តិការណ៍ កីឡាអាស៊ីអាគ្នេយ៍ នៅកម្ពុជាហើយ។ប៉ុន្តែក្នុងកិច្ចប្រជុំថ្នាក់ដឹកនាំកីឡា ទាំងក្រសួងអប់រំ យុវជន និងកីឡា និងគណៈកម្មាធិការជាតិ អូឡាំពិកកម្ពុជា តែងលើកឡើងថា សហព័ន្ធកីឡាកាយវប្បកម្ម និងលំហាត់ប្រាណកម្ពុជា ជាសហព័ន្ធបម្រុងឬសាកល្បង សម្រាប់ ស៊ីហ្គេម នៅឆ្នាំ២០២៣ទៅវិញ។ចំណុចនេះអាចធ្វើឱ្យកីឡាករបាក់ទឹកចិត្តដោយសារពួកគេសុទ្ធតែជាកីឡាករស្ម័គ្រចិត្ត មិនមានការឧបត្ថម្ភ គាំទ្រគ្រប់គ្រាន់នោះទេ។
សូមបញ្ជាក់ថា ព្រឹត្តិការណ៍កីឡាស៊ីហ្គេម លើកទី៣១ ឆ្នាំ២០២២ នៅប្រទេសវៀតណាម សហព័ន្ធកីឡាកាយវប្បកម្ម និងលំហាត់ប្រាណកម្ពុជា បានត្រៀមកីឡាករ៤រូប និងគ្រូបង្វឹកមួយរូបប្រកួតលើ៣វិញ្ញាសាគឺវិញ្ញាសា ទម្ងន់ ៨០ គីឡូក្រាម, ៨៥គីឡូក្រាម និង Athletic Physique ២នាក់។ បន្ទាប់ពីស៊ីហ្គេម នៅវៀតណាម ក្នុងខែវិច្ឆិកា ឆ្នាំ២០២២នេះ សហព័ន្ធគ្រោង បញ្ជូនកីឡាករ ៣រូប គ្រូបង្វឹក១រូប ចៅក្រម១រូប និងប្រតិភូ១រូប ទៅចូលរួមការប្រកួតកីឡាកាយវប្បកម្មជើងឯកពិភពលោក នៅកោះសូម៉ាត្រា ប្រទេសឥណ្ឌូនេស៊ីផងដែរ៕