វិមានក្រឹមឡាំងបាននិយាយនៅក្នុងសេចក្តីថ្លែងការណ៍មួយថា នៅក្នុងកិច្ចសន្ទនាតាមទូរស័ព្ទមួយជាមួយនាយករដ្ឋមន្រ្តីលុចសំបួរ លោក Xavier Bettel ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានសង្កត់ធ្ងន់កាលពីថ្ងៃសៅរ៍ថា «លក្ខណៈមិនអាចទទួលយកបាននៃសកម្មភាពយោធា-ជីវសាស្ត្ររបស់សហរដ្ឋអាមេរិកនៅក្នុងប្រទេសអ៊ុយក្រែន»។
លោក ពូទីន បាននិយាយថា សកម្មភាពបែបនេះបង្កគ្រោះថ្នាក់ដ៏ធំដល់រុស្ស៊ី និងអឺរ៉ុបទាំងមូល។
សេចក្តីថ្លែងការណ៍នោះបាននិយាយថា មេដឹកនាំទាំងពីរបានពិភាក្សាគ្នាអំពីប្រតិបត្តិការយោធារបស់រុស្ស៊ីនៅអ៊ុយក្រែន ហើយលោក ពូទីន បានកត់សម្គាល់ចំពោះការវាយប្រហារដោយគ្រាប់មីស៊ីលរបស់កងកម្លាំងសន្តិសុខអ៊ុយក្រែនទៅលើទីក្រុងនានាក្នុងតំបន់ Donbass។
យោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័រផ្លូវការរបស់រដ្ឋាភិបាលលុចសំបួរ បានឱ្យដឹងថា លោក Bettel បាននិយាយថា យើងត្រូវតែបញ្ចប់ជម្លោះ ហើយគ្មាននរណាម្នាក់នៅទទួលរងការប៉ះទង្គិចទាំងនេះទេ ដោយមិនមែនរុស្ស៊ី មិនមែនអឺរ៉ុប និងមិនមែនអ៊ុយក្រែនទេ»។
សេចក្តីថ្លែងការណ៍នោះបាននិយាយបន្ថែមថា លោក Bettel បានប្រាប់លោក ពូទីន អំពីទំនាក់ទំនងជាមួយមេដឹកនាំអ៊ុយក្រែន និងប្រទេសដទៃទៀត ហើយលោក ពូទីន បានគូសបញ្ជាក់ពីការវាយតម្លៃរបស់លោកចំពោះកិច្ចចរចាសន្តិភាពរវាងរុស្ស៊ី និងអ៊ុយក្រែន។
ក្រសួងការបរទេសរុស្ស៊ី កាលពីថ្ងៃព្រហស្បតិ៍បានស្នើឱ្យទីក្រុងវ៉ាស៊ីនតោនផ្តល់នូវព័ត៌មានទាំងអស់អំពីសកម្មភាពនៃមន្ទីរពិសោធន៍ជីវសាស្ត្រដែលជាប់ទាក់ទងនឹងសហរដ្ឋអាមេរិកនៅក្នុងប្រទេសអ៊ុយក្រែន។
កាលពីសប្តាហ៍មុន អនុរដ្ឋមន្រ្តីការបរទេសសហរដ្ឋអាមេរិកទទួលបន្ទុកកិច្ចការនយោបាយ លោកស្រី Victoria Nuland បានផ្តល់សក្ខីកម្មនៅចំពោះមុខសវនាការរបស់គណៈកម្មាធិការទំនាក់ទំនងបរទេសរបស់ព្រឹទ្ធសភា ស្តីពីអ៊ុយក្រែន ដោយទទួលស្គាល់ថា «អ៊ុយក្រែនមានកន្លែងស្រាវជ្រាវជីវសាស្ត្រ»៕(ប្រភព People’s Daily បកប្រែដោយលោក យា ចិន្តាខន្តី) សម្រួលផ្សាយដោយ៖ ធូ កុសល
