ស្ទឹងត្រែង ៖ ផលស្វាយ កែវល្មៀតគិតមកដល់ថ្ងៃទី ១៧ ខែមីនានេះមានតម្លៃមួយគីឡូក្រាមតែ៤០០ទៅ៦០០ រៀលតែប៉ុណ្ណោះ ទីផ្សារនេះបានធ្វើឱ្យកសិករអ្នកដាំដំណាំឧស្សាហកម្មមួយប្រភេទនេះ ត្រូវបាត់បង់ប្រាក់ចំណូលប្រចាំឆ្នាំ ។
ក្នុងសកម្មភាពប្រមូលផលស្វាយកែវល្មៀតនៅថ្ងៃទី ១៧មីនានេះ លោកសេងថៃ ម្ចាស់ចម្ការស្វាយនៅភូមិរាជានុកូល សង្កាត់ក្រុងស្ទឹងត្រែងខេត្តស្ទឹងត្រែង បានបញ្ជាក់ថា៖ប្រជាកសិករដំណាំដាំស្វាយនេះ បានចំណាយដើមទុនច្រើនក្នុងការថែទាំ ដល់ពេលទទួលបានផល អ្នកបញ្ជាទិញឱ្យតម្លៃទាបក្នុងមួយគីឡូក្រាម៤០០ទៅ ៦០០រៀលតែប៉ុណ្ណោះ ដែលបានធ្វើឱ្យកសិករបាត់បង់ផ្នែកសេដ្ឋកិច្ចក្នុងគ្រួសារ។
លោកបន្តថា៖បច្ចុប្បន្នកសិករយើងមានបច្ចេកទេសគ្រប់គ្រាន់ក្នុងការដាំដំណាំឧស្សាហកម្ម ដូចជាស្វាយ កែវល្មៀតនេះជាដើម អាចថែទាំធ្វើឱ្យវាផ្លែក្នុងមួយឆ្នាំបាន២លើក គ្រាន់តែពុំទាន់មានទីផ្សារច្បាស់លាស់ ព្រោះកាលពីខែតុលានិងខែ វិច្ឆិកា ស្វាយមានតម្លៃ ១.២០០ ទៅ១.៥០០រៀលក្នុងមួយគីឡូក្រាម ចំណែកនៅខែកុម្ភៈនិងខែមីនានេះមានតម្លៃតែ៤០០ទៅ៦០០ រៀល ហើយពិបាករកអ្នក បញ្ជាទិញថែមទៀត។
អ្នកស្រី លាងស្រីពៅ អ្នកប្រមូលទិញផលដំណាំផ្នែកឧស្សាហកម្មប្រចាំនៅខេត្តស្ទឹងត្រែងបានទទួលស្គាល់ថា៖ផលស្វាយកែវល្មៀតនេះ មានទីផ្សារធំនៅប្រទេសវៀត ណាម ហើយនៅឆ្នាំ២០២២ នេះអ្នកបញ្ជាទិញមានចំនួនតិច ដោយសារតែប្រទេសមួយនេះ ជួបវិបត្តិជំងឺកូវីដ១៩ខ្លាំង ។
អ្នកស្រីបញ្ជាក់ថា៖ ចំណែកនៅប្រទេសឡាវវិញឈ្មួញទិញទៅតាមតម្រូវការតិចតួច ហើយការនាំចេញទៅប្រទេសថៃ មានចម្ងាយផ្លូវឆ្ងាយ មិនអាចនាំចេញទៅបាន ព្រោះត្រូវចំណាយច្រើន ពេកហើយអ្នកបញ្ជាទិញជ្រើសរើសយកតែស្វាយមាន គុណភាព សោភ័ណភាពល្អស្អាតតែប៉ុណ្ណោះ ។
លោកសុវណ្ណពិសិដ្ឋអភិបាលស្រុកសេសានបានចាត់ទុកថា៖ នេះជាផ្នែកមួយ តម្រូវឱ្យកសិករយើងត្រូវសិក្សាយកចំណេះជំនាញការថែទាំពីគ្នាទៅវិញទៅមក ដើម្បីធ្វើឱ្យផលដំណាំនីមួយៗទទួលបានបរិមាណនិងគុណភាព តម្រូវទៅលើទីផ្សារ។
លោកកត់សម្គាល់ថា៖ឆ្លងកាត់តាមការពិនិត្យពីមន្ត្រីជំនាញកសិកម្ម ឃើញថាបច្ចុប្បន្នប្រជាកសិករយើងមានបទពិសោធន៍និងយល់ ដឹងបានច្រើនក្នុងការដាំដុះដំណាំស្វាយកែវល្មៀតនេះ។
“អ៊ីចឹងហើយក៏សូមសំណូមពរ ឱ្យបងប្អូនដែលមានចំណេះដឹង ខាងផ្នែកប្រើប្រាស់ជីប្រើប្រាស់ដី ការថែរក្សា ការថែរក្សាគ្រាប់ឬការថែរក្សាដើមនេះ សូមលោកបន្តការចែករំលែកបទពិសោធ ន៍មកដល់បងប្អូនប្រជាពលរដ្ឋទូទៅមកដល់ប្រជាពលរដ្ឋ ក្នុងស្រុកសេសានក៏ដូចជាតំបន់ផ្សេងទៀត”។
សូមបញ្ជាក់ថា៖ខេត្តស្ទឹងត្រែង កសិករអនុវត្តដាំដំណាំផ្នែកឧស្សាហកម្ម ស្វាយកែវល្មៀតនេះបានលើផ្ទៃដី៤.៣១៨ហិកតា កំពុងទទួលផល១.៩៥៥ហិកតា ក្នុងមួយហិកតាទទួលបាន ផលចំនួនប្រមាណ១០តោន ៕