រដ្ឋមន្ត្រីក្រសួងកសិកម្ម៖ ២ខែដើមឆ្នាំ២០២២ កម្ពុជានាំអង្ករក្រៅប្រទេសកើនជាង២ម៉ឺនតោនធៀបនឹងរយៈពេលដូចគ្នាឆ្នាំ២០២១

រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានបញ្ជាក់ថា ក្នុងរយៈពេល២ខែដើមឆ្នាំ២០២២នេះ កម្ពុជាបាននាំចេញអង្ករទៅក្រៅប្រទេសមានចំនួនកើនឡើងជាង២ម៉ឺនតោន បើធៀបរយៈពេលដូចគ្នាក្នុងឆ្នាំ២០២១កន្លងទៅ។

ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានសរសេរ លើបណ្តាញសង្គមនៅថ្ងៃ១៣រោច ខែមាឃ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃអង្គារ ទី០១ ខែមីនា ឆ្នាំ២០២២នេះថា នៅក្នុងរយៈពេល២ខែដើមឆ្នាំ២០២២នេះ ការនាំចេញកសិផលទៅក្រៅប្រទេសដែលអគ្គនាយកដ្ឋានកសិកម្មទទួលបាន ផ្អែកលើប្រព័ន្ធទិន្នន័យគ្រឹះភូតគាមអនាម័យ ជាតិ (National Phytosanitary Database) មានបរិមាណសរុប ១ ៨៣៥ ៤៧៥,៧០តោន ទៅកាន់ទិសដៅ ៥២ប្រទេស គឺមានការកើនឡើងចំនួន ១៥៩ ៣៣១,៣៣តោន ស្មើនឹង៩,៥១ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលទទួលបានត្រឹមតែ ១ ៦៧៦ ១៤៤, ៣៧តោន។

រដ្ឋមន្ត្រីក្រសួងកសិកម្មបានបញ្ជាក់ ថា « ការនាំចេញអង្ករ បរិមាណអង្ករនាំចេញមានចំនួន ១០៣ ០៥៨តោន កើនឡើងចំនួន ២៦ ៨៣៦តោន (៣៥,២១ភាគរយ) បើធៀបនឹងបរិមាណនាំចេញក្នុងរយៈពេល២ខែដើមឆ្នាំ២០២១ ដែលមានចំនួន ៧៦ ២២២តោន។ បរិមាណអង្ករបាននាំចេញទៅកាន់ទិសដៅសហភាពអឺរ៉ុបចំនួន ២០ប្រទេស មានបរិមាណសរុបចំនួន ២៦ ៥០៧តោន (កើនឡើងចំនួន ៧ ៥១១តោន ស្មើនឹង ៣៩,៥៤ភាគរយ)។ ទិសដៅប្រទេសចិនមានបរិមាណសរុបចំនួន ៥៦ ៣៨៥តោន (កើនឡើងចំនួន ១៨ ៧៥៥តោន ស្មើនឹង ៤៩,៨៤ភាគរយ)។ ទិសដៅអាស៊ានចំនួន ៣ប្រទេស មានបរិមាណសរុបចំនួន ៩ ៣៧០តោន (កើនឡើងចំនួន ៣ ១៤១តោន ស្មើនឹង ៥០,៤៣ភាគរយ) និងទិសដៅដទៃទៀតចំនួន១៦ប្រទេស មានបរិមាណសរុប ១០ ៧៩៦តោន (ថយចុះចំនួន ២ ៥៧១តោន ស្មើនឹង១៩,២៣ភាគរយ)» ។
ជាមួយគ្នានោះដែរឯកឧត្តមរដ្ឋមន្ត្រី ក៏បានលើកឡើងថា ក្រុមហ៊ុនដែលបាននាំចេញអង្ករមានចំនួន ៤១ក្រុមហ៊ុន ហើយបរិមាណអង្ករដែលបាននាំចេញដោយក្រុមហ៊ុនធំៗចំនួន១០ មានរហូតដល់ ៧៧ ០៣៩តោន (៧៥,០២ភាគរយ) និងក្រុមហ៊ុន៣១ដទៃ ទៀតបាននាំចេញត្រឹមតែ ២៦ ០១៩តោន (២៤,៩៨ភាគរយ)។

ចំណែកការនាំចេញស្រូវវិញ រដ្ឋមន្ត្រីក្រសួងកសិកម្មក៏ បានឱ្យដឹងថា បរិមាណនាំចេញ ស្រូវមានចំនួន ៦៥១ ១០១តោន ទៅកាន់ប្រទេសវៀតណាម (មានវិញ្ញាបនបត្រភូតគាមអនាម័យចំនួន ៤១៣ ៧៧៥តោន) ដែលមានការកើនឡើងចំនួន ៩២ ០៦៨តោន (១៦,៤៧ភាគរយ) បើធៀបនឹងរយៈពេលដូចគ្នានៅឆ្នាំ២០២១ ដែលមានចំនួន ៥៥៩ ០៣៣តោន។

ឯកឧត្តមមានប្រសាសន៍ថា សរុបការនាំចេញកសិផលក្រៅពីស្រូវ-អង្ករ គឺមានបរិមា ណ នាំចេញកសិផលក្រៅពីស្រូវ-អង្ករ មានចំនួន ១ ៣១៨ ៦៤២,៧០តោន កើនឡើងចំនួន ៦ ៥៧០,៣៣តោន ស្មើនឹង ០,៥០ភាគរយ បើធៀបនឹងរយៈពេលដូចគ្នាក្នុងឆ្នាំ២០២១ ដែលមានចំនួន ១ ៣១២ ០៧២,៣៧តោន ៕