កសិករឈីវ ហុង រស់នៅស្រុកសូទ្រនិគម ខេត្តសៀម រាប កំពុងមមាញឹកក្នុងការងារ ប្រមូលដំណាំផ្សិតចំបើង ដើម្បីយកទៅលក់ទីផ្សារក្នុងក្រុង ដែលមានតម្លៃល្អ ហើយមិនពិបាកលក់ចេញ។
អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍! លោកឈីវ ហុង កសិកររស់នៅឃុំសំរោង ស្រុកសូទ្រនិគម ខេត្តសៀមរាប បានប្រាប់អ្នកយកព័ត៌មានវិទ្យុជាតិកម្ពុជាថា លោកដំាដុះដំណាំបន្លែចម្រុះ និងចិញ្ចឹម សត្វ រយៈពេលប្រមាណជាង ២០ឆ្នាំមកហើយ ដោយបច្ចុប្បន្នលោកកំពុងដាំដុះបន្លែចម្រុះជាច្រើនមុខ ជាពិសេសកំពុងប្រមូលផល និងបណ្តុះផ្សិតចំបើង លក់ទៅកាន់ទីផ្សារ។
លោកបន្តថា ផ្សិត ចំបើងជាដំណាំមួយប្រភេទ មានរយៈពេលខ្លីតែ១៥ថ្ងៃ គឺអាចប្រមូលផលបាន កសិករភាគច្រើនគឺគាត់ចូលចិត្ត ព្រោះអាចលក់បានក្នុងតម្លៃថ្លៃគួរសម។ លោកបន្តថា ក្នុងមួយថ្ងៃលោកអាចប្រមូលផល ផ្សិត ចំបើងលក់ទៅកាន់ទីផ្សារ បានចន្លោះពី៣០ ទៅ៤០ គីឡូក្រាម និងមានតម្លៃជា មធ្យម១២០០០រៀលក្នុងមួយគីឡូក្រាម។
សំឡេង៖ផ្សិតចំបើង ក្នុងរោងនេះមាន២០បន្ទប់ ក្នុងមួយបន្ទប់មានទទឹង៦ម៉ែត្រ បណ្តោយ៨ម៉ែត្រ ក្នុងមួយរោងមាន៣គ្រែ ក្នុងមួយគ្រែមាន៥ជាន់ ក្នុងមួយថ្ងៃគិតជាមធ្យម៣០ទៅ៤០គីឡូក្រាមជារៀងរាល់ថ្ងៃ គិតជាមធ្យមមួយគីឡូ១២០០០រៀល។
វិធីសាស្ត្រយើងដាំមិនខុសគ្នា និងមេរៀនដែលកសិករធ្លាប់រៀនទេ តែបញ្ហាសំខាន់ក្នុងការថែទាំ នេះជាចំណុចសំខាន់ កាលណាយើងថែទាំអត់ត្រូវទេ វាប្រឈមមុខនឹងការខូច រលួយ ឬអត់ដុះ អាយុ កាលរបស់វាអត់យូរទេ ក្នុងចន្លោះ ២សប្តាហ៍អាចប្រមូលផលបាន។
គួរជម្រាបផងដែរថា លោកឈាវ ហុង ជាកសិករគំរូជាប់ចំណាត់ថ្នាក់លេខ២ ទូទាំងប្រទេសផ្នែកដំណាំបន្លែ លោកបានចាប់យកមុខរបរដាំបន្លែគ្រប់ប្រភេទមានជីគ្រប់ មុខ ផលិតស្រូវពូជ ចិញ្ចឹមមាន់ បណ្តុះផ្សិត និងចិញ្ចឹមត្រីជាដើមអស់រយៈពេលប្រមាណ ២០ឆ្នាំ មកហើយ។ បច្ចុប្បន្នលោក ជាប្រធានបន្លែសុវត្ថិភាព ហុងអេកូ និងជា សមាជិកបណ្តុំអាជីវកម្មផ្សិតសំរោងមានជ័យ ស្ថិតភូមិសំរោង ឃុំសំរោង ស្រុកសូទ្រនិគម ខេត្តសៀមរាប។
លោកឈាវ ហុង ជាអ្នកត្រួតពិនិត្យ វាយតម្លៃ នៃសហគម ន៍កសិកម្មសំរោងមានជ័យ និងអ្នកប្រមូលទិញកសិផលពីក្រុមផលិត នៃបណ្តុំអាជីវកម្មផ្សិត៕
