ប្រជាកសិករខេត្តឧត្តរ មានជ័យ បានបង្កើនការដាំដុះដំឡូងមី បន្ទាប់ពីការធ្វើស្រែចម្ការ ដើម្បីបំពេញតម្រូវការទីផ្សារ និងរកប្រាក់ចំណូលបន្ថែម ក្នុងការផ្គត់ផ្គង់ជីវភាព រស់នៅ ប្រចាំថ្ងៃ។
លោក សូត្រ ស៊ីសុខឃាង ប្រធានមន្ទីរកសិកម្មខេត្តឧត្តរ មានជ័យបានឱ្យដឹងថា ប្រជា កសិករខេត្តឧត្តរមានជ័យ បានបង្កើនការដាំដុះដំឡូងមីច្រើនឡើងពីមួយឆ្នាំទៅមួយ ឆ្នាំ ខណៈដែលបច្ចុប្បន្ន ដំណាំនេះ អាចទទួលបានប្រាក់ ចំណូលសមរម្យ និងមានទីផ្សារល្អ។ លោកបានបន្តថា ដំឡូងមីដែលប្រជាកសិករនិយមដាំនាពេលនេះ គឺពូជ KU៥០ ដែលជាពូជល្អធន់និងជំងឺនាំយកមកពីស្ថានីយអគ្គនាយកដ្ឋានកសិកម្ម ដើម្បីឱ្យពួកគាត់យកមកធ្វើការដាំ ដុះឆាប់ធំល្អមិនបារម្ភពីសត្វ ល្អិតយាយីនិងទទួលបានទិន្នផលខ្ពស់។
លោកបានបន្តទៀតថា ប្រជាកសិករនៅតាមបណ្តុំបានចាប់ផ្តើមយកពូជនេះមកដាំលើផ្ទៃដីជាង១០០០ម៉ែត្រ ក្រឡាហើយនៅពេលបាន ផល ពួកគាត់បានបំបែកពូជទាំងអស់នេះ ទៅឱ្យកសិករផ្សេងៗទៀតក្នុងបណ្តុំបានពូជល្អនេះដាំដុះគ្រប់គ្នាៗដើម្បីបំពេញតម្រូវការទីផ្សារឱ្យបានគ្រប់គ្រាន់។
«ក្នុងរដូវប្រាំងនេះជាទូទៅខេត្តឧត្តរមានជ័យជាកសិករផ្តោតសំខាន់ទៅលើដំណាំដំឡូងមី ព្រោះដំឡូងមីយើងនេះជាដំណាំទទួលបានចំណូលសមរម្យហើយមានទីផ្សារតែម្ដងពេលនេះកសិករដាំដុះច្រើន និងកំពុងប្រមូលផល និងកំពុងដាំវិញលើផ្ទៃដីចូល ៧ម៉ឺនហិកតាជាងអីចឹងនៅតំបន់ផ្សេងៗគាត់ធ្វើស្រូវ ប្រាំងតែនៅតំបន់នេះគាត់ប្រែ ក្លាយដីទៅជាដីដាំដំឡូងមីដើម្បីបំពេញតម្រូវការលើការផ្គត់ផ្គង់ទាំងប្រទេសថៃនិងប្រទេសវៀតណាម»។
លោកប្រធានមន្ទីរក៏បានបន្តទៀតថា កន្លងមកដំឡូងមីសើមកសិករអាចលក់បានតម្លៃ២៩០រៀលក្នុងមួយគីឡូក្រាម ខណៈដំឡូងមីស្ងួតអាចលក់បានតម្លៃ៧៥០រៀលក្នុងមួយគីឡូក្រាម៕
