កសិករមួយរូបរស់នៅក្នុងក្រុងសៀមរាបអាចរកប្រាក់ ចំណូលបានប្រមាណ១លានទៅ២លានរៀល ពីការដាំដុះដំណាំឆៃថាវ វិលជុំ និងការប្រមូលផលបន្លែផ្សេងៗដើម្បីយកប្រាក់ផ្គត់ផ្គង់ការចំណាយក្នុងគ្រួសារ។
អ្នកយកព័ត៌មានយើងប្រចាំខេត្តសៀមរាបធ្វើសេចក្តីរាយការណ៍! លោកតី ទី កសិកររស់នៅសង្កាត់នគរធំ ក្រុងសៀមរាប បានឱ្យដឹងថា លោកចាប់ផ្តើមមុខរបរដាំដុះបន្លែចម្រុះរយៈ ពេលប្រមាណ២០ឆ្នាំមកហើយ ដោយបច្ចុប្បន្នលោកកំពុងដំាដុះដំណាំសណ្តែកគួ ត្រសក់ និងកំពុងប្រមូលផល ដំណាំឆៃថាវលក់ទៅកាន់ទីផ្សារ។
លោកបន្តថា ផ្ទៃដីដែលដាំ ដុះដំណាំឆៃថាវ ប្រមាណ ៨០០ម៉ែត្រការរ៉េ អាចប្រមូលផលបានជាង២តោន និងមានម៉ូយមកប្រមូលទិញដល់លំ នៅឋានតែម្តង មិនព្រួយបារម្ភរឿងទីផ្សារលក់ចេញឡើយ។កសិកររូបនេះបញ្ជាក់ថា ជាមធ្យមក្នុងមួយខែអាចរកប្រាក់ចំណូលបានពីការដាំដុះបន្លែចម្រុះ បានប្រមាណ១ លានទៅ២លានរៀល ដើម្បីផ្គត់ផ្គង់ការចំណាយក្នុងគ្រួសារ។ សំឡេង៖បច្ចុប្បន្នខ្ញុំដាំឆៃថាវ សណ្តែកគួ និងត្រសក់លើ ផ្ទៃដីជួនកាលក៏២០គុណ ៤០ ម៉ែត្រ ជួនកាលក៏៤០ម៉ែត្របួនជ្រុង តាមខែយើងដាំបាន តែខែប្រាំង ខែវស្សាក៏លិចទឹកដាំអត់កើត កំពុងតែប្រមូលផលបណ្តើៗដែរ ទិន្នផលក្បាល ដី២០បណ្តោយ៤០អ៊ីចឹង ជួនកាលក៏បាន២តោនទៅ៣តោន ម៉ូយគេមកយកដល់ចម្ការ១គីឡូ៦០០រៀល កាលពីខែមុនលក់បាន ១៥០០រៀល ដល់ពេលបច្ចុប្បន្នគេដាំច្រើនបានទិន្នផលច្រើនតម្លៃធ្លាក់ចុះ មួយខែប្រមូលផលម្តងក្នុងមួយខែបាន១លានទៅ២ លានរៀល។
លោកបន្តទៀតថា ដើមឡើយការងារដំដុះដំណាំឆៃថាវ សណ្តែកគួ ត្រសក់ និងបន្លែផ្សេងៗ ប្រើប្រាស់តែបច្ចេក ទេសក្នុងការដាំដុះតាមបែបបុរាណតែប៉ុណ្ណោះ តែក្រោយ មកក៏ទទួលបានការបណ្តុះ បណ្តាលជំនាញពីគម្រោងអង្គការដៃគូ និងមន្ទីរកសិកម្មខេត្ត លោកក៏មានចំណេះដឹងគ្រប់គ្រាន់ក្នុងការអនុវត្តកសិកម្មតាមបែបទំនើប ដែលមានភាពងាយស្រួលក្នុងការដាំដុះ ទទួលបានទិន្នផលខ្ពស់ ចំណេញពេលវេលា និងមិនប៉ះពាល់ដល់សុខភាពអ្នកដាំនិងអ្នកទទួលទានឡើយ។
សូមជម្រាបផងដែរថា លោកតី ទី ជាកសិករគំរូមួយរូបដែលបានអនុវត្តកសិកម្មល្អ ដែលធ្លាប់ទទួលបានសម្ភារកសិកម្ម និងការបណ្តុះ បណ្តាលជំនាញបច្ចេកទេសផ្សេងៗពីគម្រោងអង្គការដៃគូ មន្ទីរកសិកម្មខេត្ត និងគម្រោងអាស្ប៉ាយ ហើយបច្ចុប្បន្នលោក តី ទី ក៏ជាប្រធានបណ្ដុំអាជីវកម្មបន្លែសុវត្ថិភាពអញ្ចាញ ដែលស្ថិតនៅភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។
