លោកស្រី សុខ សីហា អគ្គលេខាធិការ ក្លិបកីឡាហែលទឹកក្រសួងព័ត៌ មានបានបង្ហាញនូវក្តីមោទនភាព ដែលក្លិបអាចដំណើរបានអស់រយៈពេលជាច្រើនឆ្នាំមកនេះ អាស្រ័យដោយទទួលបានការឧបត្ថម្ភគាំទ្រដ៏ខ្ពង់ខ្ពស់ ក្នុងការគាំទ្រ ទាំងថវិកា ស្មារតី និងសម្ភារពីសំណាក់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានកិត្តិយសក្លិបហែលទឹកក្រសួងព័ត៌មាន ដែលឯកឧត្តម គឺជាអ្នកផ្តួចផ្តើមគំនិតក្នុងការបង្កើតក្លិបនេះឡើង។
លោកស្រី សុខ សីហា តំណាងប្រធានក្លិប លោក សុខ សារ៉េត បន្ថែមថា ការផ្តល់ការលើកទឹកចិត្តនេះ គឺជាកម្លាំងចិត្តក្នុងការបណ្តុះបណ្តាល និងបង្កើនគុណភាពកីឡាករ កីឡាការិនីប្រចាំក្លិបរបស់ខ្លួន ឱ្យចូលរួមប្រកួតប្រជែងមេដាយ ពីការប្រកួតកីឡាហែលទឹកថ្នាក់ជាតិ និងព្រឹត្តិការណ៍ហែលទឹកក្នុងស្រុកជាច្រើនទៀត។
ជាក់ស្តែងនៅក្នុងការប្រកួតកីឡាហែលទឹក ជ្រើសរើសជើងឯកថ្នាក់ជាតិ ប្រចាំឆ្នាំ២០២១ និងសម្ពោធមណ្ឌលហែលទឹកបាត់ដំបង ខេត្តបាត់ដំបង កាលពីថ្ងៃទី១០ ខែមករា ឆ្នាំ២០២២ ក្លិបក្រសួងព័ត៌មានបានបញ្ជូនកីឡាករ កីឡាការិនីចំនួន៣នាក់ ក្នុងនោះកីឡាករជម្រើសជាតិ លឹម សុខវឌ្ឍន៍នន្ទ ដណ្តើមមេដាយបាន៣គ្រឿង គឺមេដាយប្រាក់២ និងសំរឹទ្ធិ១គ្រឿង។ ចំពោះ២នាក់ទៀតមិនទទួលបានមេដាយទេ ដោយត្រូវបន្តដុះខាត់សមត្ថភាពបន្ថែមទៀត នាឱកាសក្រោយៗ ដោយសារនេះជាការប្រកួតហែលទឹកថ្នាក់ជាតិ ដែលកីឡាករកីឡាការិនីចូលរួមសុទ្ធសឹងតែមានកម្រិតសមត្ថភាពខ្ពស់ៗ។
អគ្គលេខាធិការដដែលបន្ថែម ថ្វីដ្បិតតែក្លិបហែលទឹកក្រសួងព័ត៌មាន មានចំនួនកីឡាករ កីឡាការិនីតិច ប៉ុន្តែមានគុណភាព ដោយអាចថែរក្សានូវមេដាយបន្តទៀតបាន។ អ្វីដែលសំខាន់ គឺកីឡាករ លឹម សុខវឌ្ឍន៍នន្ទ ដែលដណ្តើមបានមេដាយ៣គ្រឿងនេះ គឺទើបមានអាយុ១៥ឆ្នាំ ដែលចូលរួមប្រកួតប្រជែងជាមួយយុវជនអាយុ១៨ឆ្នាំឡើង ដោយម្ចាស់ជ័យលាភីរូបនេះបានបំបែកកំណត់ត្រាថិរវេលាចាស់របស់គាត់បានទៀត។
លោកស្រីអគ្គលេខាធិការថា នេះជាសមិទ្ធផលថ្មីមួយរបស់ក្លិបកីឡាហែលទឹកក្រសួងព័ត៌មាន ដែលយើងមានមោនភាពជាខ្លាំង។ ជាការកត់សម្គាល់ នៅក្នុងអំឡុងពេលបិទខ្ទប់ក្នុងបរិបទជំងឺកូវីដ-១៩ ជាង១ឆ្នាំមកនេះ សហព័ន្ធមិនបានបិទខ្ទប់កីឡាករ កីឡាការិនីនោះទេ ដោយនៅតែលើកទឹកចិត្តឱ្យកីឡាករ កីឡាការិនីសំងំហ្វឹកហាត់បង្កើនបច្ចេកទេសដដែល ។ ក្នុងនោះក្លិបក្រសួងព័ត៌មាន ពិសេសកីឡាករជម្រើសជាតិយុវជន១៥ឆ្នាំ លឹម សុខវឌ្ឍន៍នន្ទ នៅតែអាចឱ្យកីឡាករ កីឡាការិនីរបស់ខ្លួន បន្តការខិតខំហ្វឹកហាត់បង្កើនថាមពលកម្លាំង ការបំប៉នអាហារ ដែលធ្វើឱ្យយើងអាចប្រកួតប្រជែងមេដាយបាន នៅក្នុងព្រឹត្តិការណ៍ថ្នាក់ជាតិនេះ។
លោកស្រី សុខ សីហា បង្ហាញក្តីរំពឹងថា ក្លិបហែលទឹកក្រសួងព័ត៌មាននឹងទទួលបានការចូលរួមពីកីឡាករ កីឡាការិនីថ្មីៗបន្ថែម ដើម្បីឱ្យក្លិបនេះកាន់តែសម្បូរបែបនូវធនធាន ដើម្បីរួមកម្លាំងក្នុងការអភិវឌ្ឍវិស័យកីឡាហែលទឹកនៅកម្ពុជា ឱ្យកាន់តែរីកចម្រើនបន្ថែមទៀត ស្របនឹងគោលដៅដ៏ចម្បងរបស់ព្រះរាជាណាចក្រកម្ពុជា ប្រកបដោយសុខសន្តិភាពពេញបរិបូរណ៍ និងការអភិវឌ្ឍគ្រប់វិស័យ ខណៈវិស័យកីឡារបស់កម្ពុជា កំពុងត្រៀមខ្លួនឆ្ពោះទៅទទួលរៀបចំធ្វើជាម្ចាស់ផ្ទះ ការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ជាប្រវត្តិសាស្ត្រដំបូង។
ជាមួយគ្នានោះ តំណាងក្លិបក្រសួងព័ត៌មាន លោកស្រី សុខ សីហា បានថ្លែងអំណរគុណយ៉ាងជ្រាលបំផុត ចំពោះការគាំទ្រលើកទឹកចិត្តរបស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានកិត្តិយសក្រសួងព័ត៌មាន តែងតែឧបត្ថម្ភគាំទ្រគ្រប់បេសកកម្ម និងការបណ្តុះបណ្តាលធនធានរបស់ក្លិប ដោយជំរុញឱ្យគុណភាពបច្ចេកទេសរបស់កីឡាករ កីឡាការិនី របស់ក្លិបអាចប្រកួតប្រជែងប្រកបដោយសមត្ថភាព បានរហូតដល់ពេលនេះ។ ជាមួយគ្នានេះ ក្នុងនាមតំណាងក្លិប លោកស្រីក៏ថ្លែងអំណរគុណយ៉ាងជ្រាលជ្រៅចំពោះការយកចិត្តទុកដាក់ផ្តល់ការលើកទឹកចិត្ត និងការគាំទ្រពីឯកឧត្តមទេសរដ្ឋមន្ត្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹកផងដែរ។
សូមបញ្ជាក់ថា ក្លិបហែលទឹកក្រសួងព័ត៌មាន មានឯកឧត្តមរដ្ឋមន្ត្រី ខៀវ កាញារីទ្ធ ជាប្រធានកិត្តិយស និងទីប្រឹក្សា គឺឯកឧត្តម លី វ៉ាន់ហុង និងឯកឧត្តម ម៉ែន សាម៉ន និងសមាជិកជាច្រើនរូបទៀត។ ក្លិបហែលទឹកក្រសួងព័ត៌មាន ក៏បានអំពាវនាវ និងលើកទឹកចិត្តជូនចំពោះ មន្ត្រីរាជការក្រសួងព័ត៌មាន ដែលមានកូនៗអាចបញ្ជូនពួកគាត់មកហ្វឹកហាត់ការហែលទឹកនៅក្លិបបាន ហើយក៏បើកបេះដូងទទួលការចូលរួមពីកីឡាករ កីឡាការិនីផ្សេងៗដូចគ្នាផងដែរ៕
