(ប៉ៃលិន)៖ ក្រោមការដឹកនាំ របស់លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានយកចិត្តទុកដាក់និងចាត់អោយក្រុមការងាររដ្ឋបាលខេត្ត សហការជាមួយយុវជនស្ម័គ្រចិត្តសសយក ជួយសម្រួលដល់សិស្សានុសិស្សដែលមករៀនសូត្រនៅកម្ពុជានិងបងប្អូនប្រជាពលរដ្ឋខ្មែរដែលវិលត្រឡប់មកពីប្រទេសថៃប្រកបដោយសុវត្ថិភាពនិងកក់ក្តៅបំផុតដោយមិនមានការបារម្ភក្រោយវិលមកដល់ស្រុកកំណើត។ជាក់ស្តែងនៅព្រឹកថ្ងៃទី០៥ ខែកក្កដា ឆ្នាំ២០២៥នេះ សហភាពសហព័ន្ធយុវជនកម្ពុជា (ស.ស.យ.ក)ខេត្តប៉ៃលិន បានយកចិត្តទុកដាក់ខ្ពស់ ចំពោះសុខទុក្ខ របស់ពលករខ្មែរ ដែលធ្វើដំណើរឆ្លងដែន ក្នុងនោះក្រុមការងារសហភាពសហព័ន្ធយុវជនកម្ពុជា(ស.ស.យ.ក)ខេត្ត បានរៀបចំសកម្មភាពជួយជញ្ជូនសម្ភារៈផ្ទាល់ខ្លួន របស់ពលករ ដែលត្រឡប់មកពីប្រទេសថៃ ចូលមកប្រទេសកម្ពុជាវិញ។
បើតាមប្រភពព័ត៌មាន ពីយុវជនសហភាពសហព័ន្ធយុវជនកម្ពុជាខេត្ត បានលើកឡើងថា៖ សហភាពសហព័ន្ធយុវជនកម្ពុជាខេត្ត ក្រោមការដឹកនាំ របស់លោកជំទាវបណ្ឌិត បាន ស្រីមុំ ប្រធានសហភាពសហព័ន្ធយុវជនកម្ពុជា (ស.ស.យ.ក.) ខេត្តប៉ៃលិន តែងតែធ្វើសកម្មភាពមនុស្សធម៌ជាប្រចាំ ពិសេសក្នុងអំឡុងពេលនេះ គឺយើងបានចូលរួមសកម្មភាព ជួយសម្រួលបន្ទុក ដល់ពលករខ្មែរ ដែលវិលត្រលប់មកស្រុកកំណើត ពាក់ព័ន្ធការជួយដឹកជញ្ជូនសម្ភារៈពលករឆ្លងកាត់ព្រំដែន ,ការផ្សព្វផ្សាយ និងអប់រំជាសាធារណៈ អំពីសារៈសំខាន់ នៃសុវត្ថិភាពពលករចំណាកស្រុក , ការផ្សព្វផ្សាយព័ត៌មាន និងការណែនាំនានា ស្តីពីហានិភ័យ ដែលអាចកើតមាន ចំពោះពលករចំណាកស្រុក និងវិធីការពារខ្លួន ក៏ដូចជាសិទ្ធិរបស់ពួកគាត់។
ជាមួយគ្នាលោកជំទាវអភិបាលខេត្តប៉ៃលិនបានអំពាវនាវដល់បងប្អូនប្រជាពលរដ្ឋដែលរស់នៅប្រទេសថៃសូមមានការប្រុងប្រយ័ត្នអោយបានខ្ពស់និងនាំគ្នាវិលត្រឡប់មកស្រុកយើងវិញព្រោះក្រុមការងារនៅរង់ចាំទទួលនិងប្រឹក្សាយោបល់ពិសេសជួយរកការងារអោយធ្វើ ហើយស្រុកយើងកំពុងខ្វះកម្លាំងពលកម្មផងដែរ៕
