ព្រះវិហារ៖ព្រឹកថ្ងៃទី១០ ខែមេសា ឆ្នាំ២០២៥ រដ្ឋបាលខេត្តព្រះវិហារបានរៀបចំពិធីសូត្រមន្តប្រោះព្រំសិរីមង្គល ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ក្រោមអធិបតីភាព ឯកឧត្តម ប្រាក់ សុវណ្ណ ប្រធានក្រុមប្រឹក្សាខេត្ត និងឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ។ ពិធីនេះមានការអញ្ជើញចូលរួមយ៉ាងច្រើនកុះករពីឯកឧត្តម លោកជំទាវ សមាជិកក្រុមប្រឹក្សាខេត្ត លោក លោកស្រីអភិបាលរងខេត្ត ប្រធាន អនុប្រធានមន្ទីរ អង្គភាពជុំវិញខេត្ត កងកម្លាំងទាំងបី និងមន្ត្រីរាជការសាលាខេត្តជាច្រើនរូបទៀត។
ក្នុងបរិយាកាសដ៏រីករាយ និងពោរពេញដោយសេចក្តីសោមនស្សរីករាយនៃពិធីបុណ្យចូលឆ្នាំថ្មីប្រពៃណីជាតិខ្មែរ គេសង្កេតឃើញមានការសម្ដែងរបាំត្រុដិ ដែលជាទម្រង់សិល្បៈបុរាណដ៏មានតម្លៃរបស់ខ្មែរ។ របាំនេះត្រូវបានគេជឿថាអាចបណ្ដេញឧបទ្រពចង្រៃ និងនាំមកនូវសិរីសួស្ដីដល់ប្រជាជន។ ការសម្ដែងរបាំត្រុដិបានធ្វើឱ្យពិធីបុណ្យនេះកាន់តែមានអត្ថន័យ និងភាពអធិកអធមថែមមួយកម្រិតទៀត។
ពិធីនេះប្រព្រឹត្តទៅក្នុងគោលបំណងដើម្បីឧទ្ទិសបួងសួងសុំសេចក្តីសុខ សេចក្តីចម្រើន និងសិរីសួស្ដីដល់ប្រជាជនខ្មែរទាំងអស់ ជាពិសេសប្រជាជនក្នុងខេត្តព្រះវិហារ។ លើសពីនេះ ពិធីនេះក៏ជាការបង្ហាញពីការគោរព និងថែរក្សាវប្បធម៌ប្រពៃណីដ៏ល្អផូរផង់របស់ខ្មែរផងដែរ៕ ដោយ ខៀវ ផល្លា ពីព្រះវិហារ
