លោកឧត្ដមសេនីយ៍ទោ ឈឿន សុចិត្ត បញ្ជាយ៉ាងម៉ឺងម៉ាត់ឲ្យកម្លាំងជំនាញបើកការស្រាវជ្រាវជាបន្ទាន់ចំពោះក្រុមអ្នកលេងដាវសាំម៉ូរ៉ៃ​ និងដំបង ២ក្រុមបើកឆាកប្រយុទ្ធគ្នា រំខានដល់ដំណេកប្រជាពលរដ្ឋ

កណ្តាល៖ លោកឧត្ដមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានដាក់បទបញ្ជាយ៉ាងម៉ឺងម៉ាត់បំផុតឲ្យកម្លាំងផ្នែកជំនាញពាក់ព័ន្ធប្រញាប់ប្រញាល់បើកការស្រាវជ្រាវជាបន្ទាន់ កំណត់រកអត្តសញ្ញាណបក្ខពួកជនបង្ក ដើម្បីយកមកសាកសួរ​ និងចាត់ការតាមនីតិវិធីច្បាប់ចំពោះក្រុមអ្នកលេងដាវសាំម៉ូរ៉ៃ​ និងដំបង ចំនួន០២ក្រុមដែលបានបើកឆាកប្រយុទ្ធគ្នា ដោយមិនដឹងមូលហេតុ ជាហេតុបណ្ដាលឲ្យមានការរំខានដល់ដំណេកប្រជាពលរដ្ឋនៅជិតខាង នៅចំណុចផ្លូវកែងផ្សារតាខ្មៅចាស់ សង្កាត់តាខ្មៅ ក្រុងតាខ្មៅ ខេត្តកណ្តាល។ បទបញ្ជាដ៏ម៉ឺងម៉ាត់របស់លោកឧត្តមសេនីយ៍ទោ ឈឿន សុចិត្ត ធ្វើឡើងក្រោយពីទទួលបានព័ត៌មានខាងលើភ្លាមៗ។

តាមប្រភពបានឲ្យដឹងថា កម្លាំងផ្នែកយុត្តិធម៌នៃអធិការដ្ឋាននគរបាលក្រុងតាខ្មៅ​ និងកម្លាំងប៉ុស្ដិ៍នគរបាលរដ្ឋបាលតាខ្មៅ នៅថ្ងៃចន្ទទី០៥ ខែធ្នូ ឆ្នាំ២០២២នេះ បានចុះត្រួតពិនិត្យដល់ទីតាំងខាងលើ ស្ថិតនៅផ្លូវលេខ១០៧ កែង២០៦ ផ្សារតាខ្មៅ ភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាលបានឱ្យដឹងថា យោងតាមការបំភ្លឺរបស់ឈ្មោះ ប៉ិន ជីវ៉ា ភេទប្រុស អាយុ ៣២ឆ្នាំ មុខរបរ បុគ្គលិកហាងស៊ុបខ្យង យីហោសុគន្ធារី មានអាសយដ្ឋាននៅ កោះពេជ្រ ដែលបានស្ថិតនៅក្នុងព្រឹត្តិការណ៍នោះ បានបំភ្លឺថា៖ ជម្លោះនោះគឺជនបង្កនៅម្តុំចាក់អង្រែ ហើយម្ខាងទៀត គឺជាកម្មករស្នាក់នៅលើផ្សារតាខ្មៅចាស់ ជាកម្មករលក់ស៊ុបខ្យងនៅកោះពេជ្រ។