រដ្ឋមន្ដ្រីការពារជាតិជប៉ុន បានវាយតម្លៃខ្ពស់ និងគាំទ្រចំពោះការដឹកនាំរបស់កម្ពុជា ក្នុងការ ស្វែងរកដំណោះស្រាយ បញ្ហានៅប្រទេសមីយ៉ាន់ម៉ា ។ ការបង្ហាញការគាំទ្របែបនេះ ក្នុងគ្រាដែលសម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណា ចក្រកម្ពុជា បានអនុញ្ញាតឱ្យ ឯកឧត្តម គីស៊ី ណូប៊ុអូ (KISHI Nobuo) រដ្ឋមន្ដ្រីការពារជាតិជប៉ុន ចូលជួបនិងពិភាក្សាការងារ នាព្រឹកថ្ងៃទី ២២ ខែមិថុនា ឆ្នាំ២០២២ នេះ។
នៅក្នុងជំនួប ឯកឧត្តម គីស៊ី ណូប៊ុអូ (KISHI Nobuo) បានជម្រាបជូនសម្ដេចតេជោថា វត្តមានរបស់ឯកឧត្តម នៅកម្ពុជានាពេលនេះ គឺដើម្បីបំពេញទស្សនកិច្ច និងចូលរួមកិច្ចប្រជុំក្រៅផ្លូវការ រដ្ឋមន្ត្រីការពារជាតិអាស៊ាន-ជប៉ុន ចំខួប ៣០ឆ្នាំ នៃការបញ្ជូនកងរក្សាសន្តិភាពនៅកម្ពុជា ។
ឯកឧត្តម បានបន្តថា ថ្ងៃទី ២១ ខែមិថុនា ឯកឧត្តម បានជួបសំដែងការគួរសម និងពិភាក្សាការងារជាមួយសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិផងដែរ។ជាមួយគ្នានេះឯកឧត្តម គីស៊ី ណូប៊ុអូ ក៏បានអរគុណចំពោះការទទួល ឯកឧត្តម ដោយភាពកក់ក្តៅ ហើយបានគោរពជម្រាបជូនសម្ដេចតេជោថា
ទី១. ឯកឧត្តម មានសេចក្តីរីករាយ ជាមួយនឹងការផ្លាស់ ប្ដូរទស្សនកិច្ច រវាងថ្នាក់ដឹកនាំក្រសួងការពារជាតិកន្លងមក ដែលធ្វើឱ្យកិច្ចសហប្រតិបត្តិការរវាងក្រសួងការពារជាតិទាំងពីរ កាន់តែរីកចម្រើន និងកាន់តែស៊ីជម្រៅ ។
ទី២. បានជួបពិភាក្សាជាមួយនឹង ឯកឧត្តម ហ៊ុន ម៉ាណែត ដោយបានផ្លាស់ប្ដូរទស្សនៈ អំពីស្ថានភាពនាពេលបច្ចុប្បន្ននៅក្នុងតំបន់ និងលើពិភព លោក រួមជាមួយការពង្រឹង និងពង្រីកកិច្ចសហប្រតិបត្តិការផងដែរ ។
ទី៣. សូមគោរពវាយតម្លៃខ្ពស់ និងគាំទ្រការដឹកនាំរបស់កម្ពុជា ក្នុងការស្វែងរកដំណោះស្រាយបញ្ហាប្រទេសមីយ៉ាន់ម៉ា ជាពិសេស ការជំរុញការអនុវត្តតាមគោលការណ៍ឯកច្ឆ័ន ៥ចំណុចនោះ ។
ជាការឆ្លើយតបសម្ដេចតេជោ ហ៊ុន សែន បានឯកភាពជាមួយនឹង ឯកឧត្តម គីស៊ី ណូប៊ុអូ (KISHI Nobuo) ចំពោះកិច្ចសហប្រតិបត្តិការលើវិស័យការពារជាតិ ឱ្យកាន់តែស៊ីជម្រៅ និងបើក ទូលាយ ជាពិសេស តាមរយៈការផ្លាស់ប្ដូរទស្សនៈ លើការ វាយតម្លៃស្ថានភាពតំបន់ និងពិភពលោក ។
សម្ដេចតេជោនាយករដ្ឋមន្ត្រី បានថ្លែងនូវការគាំទ្រចំពោះកិច្ចសហប្រតិ បត្តិការ ដែលមានស្រាប់ និងសូមឱ្យបន្តជំរុញផែនការ នៃកិច្ចសហប្រតិបត្តិការទ្វេភាគីកម្ពុជា-ជប៉ុន ឱ្យកាន់តែសកម្មថែមទៀត។ ដូចជាការផ្លាស់ប្តូរទស្សនកិច្ច នាយទាហានវ័យក្មេង នាយទាហានថ្នាក់ ដឹកនាំជាន់ខ្ពស់ បណ្ដុះ បណ្ដាលលើកកម្ពស់សមត្ថភាពកងទ័ពជើងគោកកម្ពុជា លើការងារមនុស្សធម៌ និងសង្គ្រោះ ផ្នែកគ្រោះមហន្ត រាយ ផ្តល់វគ្គសិក្សានាយ ទាហានសកម្ម បញ្ជាការសេនាធិការវិស្វកម្ម និងសុខាភិបាលជាដើម៕
